PEE GBKP No. 111 - 120

PEE NO. 111 “ SURA-SURA DAGING LAWANLAH “

1) Sura-sura daging lawanlah tetap
Je ‘di la kam talu tambah gegehNdu
Sura-sra jahat simbaklah tetap
Ngaraplah man Yesus 
Tentu kam menang

Reff :
Pindo gegeh man Tuhan
Gelah kam lalap paguh
Ib’reNa kita menang
Menehang ras senang

2) Tadingken si jahat, olangilah dosa
UkurNdu meciho la ercinengga
Pake kebenaren nggeluh bas terang
Ngaraplah man Yesus
Tentu kam menang
Reff :

3) Geluh si mulia ib’re Dibata
Man kalak si s’tia kinitekenna
Gelah Ia kam celus. Lit kap si natang
Ngaraplah man Yesus
Tentu kam menang
Reff :


PEE NO. 112 “ TUHAN KAP PENALEMENKU “

1) Tuhan kap penalemenku
Ia si njayam geluhku
Ia kap pe sekawalku
La nggo kekurangen aku

Reff :
Tuhan si mada sinasa
Tuhan saja si pehaga
Muliakenlah gelarNa
Mari puji sembah Ia

2) Kune jumpa si mesera
Kiniteken lab opera
Tetap aku sampatiNa
K’leng ateNa la erleka
Reff :

3) Nggo terkelin jine aku
Arah perkuah ateNdu
PeratenNdu kudalanken
G’luhku e kupersembahken
Reff :


PEE NO. 113 “TUHAN I TENGAH-TENGAHTA “

1) Tuhan i tengah-tengahta
M’reken pasu-pasuNa
Maler desken lau si mbelin
Lanai lit si terulin

Reff :
Usekenlah min KesahNdu
Temani geluh kami
Gegeh kami p’limbarui
K’rina jadi mehuli

2) Tuhan i tengah-tengahta
Reh riahna ukurta
Reh tenengna pertendinta
Reh damena pusuhta
Reff :

3) Reh tetapna me ukurta
Nehken sura-suraNa
Di ernalem la kap lupa
Ermulia Tuhanta
Reff :


PEE NO. 114 “ TUHAN, KELENGINDULAH “

1) Reff : 
Tuhan kekelengindulah
Kristus, sampatiNdulah
Yesus, k’linilah kami

Pertibi enda seh kal rontangna
Dosa me si ncedai manusia
M’da nggel mesera eme peng’lakoNa

2) Reff :
La erp’ngarapen nterem kal tuhu
M’lihe ras musil ise nampatisa
‘Nterem mesera ise ngingetsa?

3) Reff :
Bayak namura nterem kal tuhu
Tapi mekatep serap ras temanna
Mbue si mate teridah medersa

4) Reff :
Mbue senjata munuh gunana
I jah i jenda seb’lang doni enda
Kai nge dagena erti geluh enda

5) Reff :
Yesus Tuhanku Juru S’lamatku
Dosa nggo masap i kayu silangNdu
Bas kekekeNdu atankeNdu aku

6) Reff :
Bahanlah kami jadi pendame
Guna pembarken KemulianNdu e
Tegulah kami ku bas k’rajanNdu


PEE NO. 115 “ TUHAN DIBATA SI NEMANI “

1) Tuhan Dibata si nemani
Seh jumpa ka kita pagi
Ia tetap singkawali
Tuhan Dibata si nemani

Reff :
Seh jumpa kita jumpa ka
Dibata si pejumpa kita
Seh jumpa kita jump aka
Dibata si pejumpa kita

2) Tuhan Dibata si nemani
Kabengna cilinggemenndu
PedahNa pangan tendindu
Tuhan Dibata si nemani
Reff :

3) Tuhan Dibata si nemani
Ibas ndele tah pe susah
Ia m’reken dalan pulah
Tuhan Dibata si nemani
Reff :

4) Tuhan Dibata si nemani
Kata Tuhan gelemenndu
Kematen pe banNa talu
Tuhan Dibata si nemani
Reff :


PEE NO. 116 “ TERUH KAYU SILANGNDU “

1) Teruh kayu silangNdu
Ku endesken geluhku
Lau sumbul kegluhen
Maler kap man bangku

Reff :
SilangNdu silangNdu
E kumuliaken
Seh ku surge ne pagin
Geluhku terkelin

2) Teruh kayu silangNdu
Tergejap kelengNdu
Desken bintang si terang
Si erbanca senang
Reff :

3) Teruh kayu silangNdu
LiasNdu kuinget
I bas dalin geluhku
KelengNdu tersinget
Reff :

4) Teruh kayu silangNdu
Tetap ‘ku ernalem
Seh ‘ku Surga me aku
Ateku pe malem
Reff :


PEE NO. 117 “TUHAN YESUS PENAMPATKU “

1) Tuhan Yesus Penampatku
Ia penalemenku
Kuikutken me dalanNdu
Kam me kegeluhen

Reff :
Teneng tetap tendingku
Paguh kinitekenku
Lanai lit kebiarenku
Tan Tuhan ku me negu

2) Tuhan Yesus Penampatku
Kam me kapen gegehku
layasiNdu kap ukurku
La teralang uliNdu
Reff :

3) Tuhan Yesus Penampatku
Nimbak praten dagingku
Suari berngi Kam kulebuh
Pengarapenku nteguh
Reff :

4) Tuhan Yesus Penampatku
Seh kedungen geluhku
Lah pusuhku tetap mambar
B’lin liasNdu ku palar
Reff :


PEE NO. 118 “ TUHAN, KAM ME SI PERMAKAN “

1) Tuhan, Kam me si Permakan
Kami biri-biriNdu
Kami tetap kap nggejapken 
B’linna keleng ateNdu
Tuhan Jesus, Juru S’lamat
Kami si k’rajangenNdu
Tuhan Jesus Jurus S’lamat
Kami si k’rajangenNdu

2) Kam Pengawal si setia
Kam sekawal geluhku
Kam pedauhken k’rina dosa
Ndilo Kalak si lalar
Tuhan Jesus Juru S’lamat
Ngendesken kami man Bandu
Tuhan Jesus Jurus S’lamat
Ngendesken kami man Bandu

3) PadanNdu ngaloken kami
Gia m’luat erdosa
Perdosa iurasiNdu
Dingen ipulahiNdu
Tuhan Jesus Juru S’lamat
Kam me Raja Penampat
Tuhan Jesus Juru S’lamat
Kam me Raja Penampat


PEE NO. 119 “ TEGU AKU ANAKNDU “

1) Tegu aku anakNdu
Bas perdalan geluhku
Di aku paksa labuh
Ambatilah musuhku

Reff :
Tegu aku
Ibas perdalanenku
Kam me ngenca kulebuh
cikepNdu tanku nteguh

2) Kam bentengku si paguh
Gia musuhku ngupuh
Amin mar ape nderpa
La aku bera-bera
Reff :

3) Seh de paksa sipatku
Tuhan tetap temanku
Lalap malem ateku
Kam ngenca penampatku
Reff :


PEE NO. 120 “ TOTONTA BEGIKENNA “

1) Totonta begikenNa
Keleng ateNa kita
Ertoto isuruhNa
Em si ngena ateNa

2) Mbelin kal kuasaNa
Ras perkuah ateNa
Sipindo si erguna 
Lah terpuji gelarNa

3) Mberat itindih dosa
Kam min si nampatisa
Melikas ban darehNdu
Tuhu terkelin aku

4) Useken min dameNdu
Kuasai lah geluhku
Kam me ulu geluhku
Tuhan kap Penebusku

5) Iban keleng ateNdu
Sikap tetap jingkangku
Gelah seh ku rumahNdu
Kam tetap penatahku

6) Peteguhi tendingki
JanggaiNdu pe kulangku
Nggeluh tah mate aku
K’rinalah man gunaNdu
Krinalah man gunaNdu