PEE GBKP No. 101 - 110

PEE NO. 101 “ PULUNG M’RIAH KAL KAMI KERINA “

1) Pulung m’riah kal kami kerina
Jumpa i bas rumah si Badia
Reh min Kam o, Bapa si Mulia
G’lah kerina Badia jadina

Reff :
Sal-Sali pusuh kami
Layasi ukur kami
Pengarapen reh teguhna
Kiniteken reh paguhna

2) Wari ras berngi nggo ibentasi
Keleng ateNdu tetap nemani
I bas mberat Kam lalap nampati
I bas susah Kam si ngelayasi
Reff :


PEE NO. 102 “ REHLAH MIN KESAH BADIA “

1) Rehlah min Kesah Badia
Demi pusuhkami enda
Bahan ukur kami salang 
ngaloken Kata Dibata
Gelah kami k’rina enda
Dame mriah ras badia

2) Di KesahNdu nggo ngiani
K’rina kap nggo ilayasi
Kiniteken tetap paguh
Tendi kami pe terasuh
G’luhken kami si mehuli
G’larndu pe tetap terpuji


PEE NO. 103 “ SIMPAR TUHU PEMERENDU “

1. Simpar tuhu pemereNdu
JujurkenNdu kap man bangku
Ermengkah kal ukurku 
La ‘ku lupa lias ateNdu

Reff :
AlokenNdu o, Tuhanku
Persembahen anakNdu
Usekenlah pasu-pasu
Peteguhi perpulungenNdu

2. Benih si isuan kami
E pe kap i bas Kam nari
kuasaNdu mahanca turah
kuasaNdu mahanca erbuh
Reff :

3. BreNdu kami kepentaren
H’lah nirangken kepapaken
Ajar kami kebujuren
Maka pinter ka perukuren
Reff :

4. M’lala denga man sampaten
Nterem denga man apulen
B’reNdu kami kengasupen
‘Lah kami sikeleng-kelengen
Reff :

5. Si tading bas kami enda
BanNdulah erlipat ganda
Kami k’rina reh ngasupna
Ndahiken dahin si mulia
Reff :


PEE NO. 104 “ SEH KAL SIMPARNA PEMERENDU “

1. Seh kal simparna pemereNdu, o Tuhan
Mejuah-juah kerina ibas jabu
La lit si magin, pinakit la ertahan
Ngataken bujur pusuh kami man baNdu

2. Nggo kap mbuah bage page si nisuan
Janah pe merih bage manuk niasuh
Ajari kami ersembah baNdu, Tuhan
Lah malem ate ras dame i bas pusuh

3. Di kiniteken erbuah bas perlagu
Bas engkelengi min ola kita medu
Bas si mehuli lalap min kiita mbaru
Tuhan Dibata tetap si masu-masu


PEE NO. 105 “ SIPUJI TUHAN ARAH GELUHTA “

1. Sipuji Tuhan arah geluhta
Si inget tetap ngaruhna banta
Ban k’leng ateNa
Nebusi kita terkelin kita si tek man Bana

2. Segedang g’luhta inget Dibata
Bas k’rina paksa ngaraplah baNa
Tetap ukurta rembak ras Ia
Erban si r’guna ula erleja

3. Reh pendungina wari-warinta
Lit kap paksana reh me Tuhannta
Ipepulungna kerina jelma
Kita si s’tia malem ateta


PEE NO. 106 “ SENDAH WARI PASKAH “

1. Sendah Wari Paskah meriah ukurta
Yesus enggo keke tangkas kuasaNa
Sendah Wari Paskah malem kal ukurta 
Yesus kap enggo keke naluken si gelap

Reff :
Surak Haleluya Surak Haleluya
Ban Yesus nggo menang
Kita pemenang

2. Sendah wari Paskah kuasa Tuhan t’ridah
Yesus pengarapen Ia penalemen
Kita nggi terkelin lias ateNa mbelin
Si Iblis enggo talu dat gegeh si mbaru
Reff :

3. Wari Paskah enda, pulung kita jenda
Talu kuasa gelap kita enggo sangap
Tetap kap ukurta, segedang umurta
Yesus me kap temanta, meriah ukurta
Reff :


PEE NO. 107 “ SADA SORANTA MUJI DIBATANTA “

1. Sada soranta muji Dibatanta
Ia jine si njayam keg’luhenta
Lalap ia ‘ngkelengi tinepaNa
Maler me kap tetap pasu-pasuNa

2. Sada soranta muji Dibatanta
S’lamat kita ban perkuah ateNa
AlokenNa kita jadi anakNa
Maler me kap tetap pasu-pasuNa

3. Sada soranta muji Dibatanta
Lit perbeben b’rekenNa dalan pulah
G’lah min kita enda jadi erbuah
Maler me kap tetap pasu-pasuNa

4. Sada soranta muji Dibatanta
Kesah Tuhan nemani bas ersaksi
Pengasupna kita e ngelayasi
Maler me kap tetap pasu-pasuNa


PEE NO. 108 “ SUSAH ENTAH SENANG GIA “

1. Susah entah senang gia ibas geluh enda
Amin kita bas perbeben Ernalem man baNa
Nggeluh bas Tuhan malem ateta
Sibegiken pedahNa
Pindo gegeh ras pasu-pasuNa
ibrekenNa man banta

2. Aminna latih mesera gegeh ib’rekenNa
Tetap ernalem man baNa kidekah geluhta
Mejingketlah ndahiken dahinNa
G’lah meriah ukurta
Sangap kalak si rembak ras Ia
Terpujilah gelarNa


PEE NO. 109 “ SISEMBAHLAH MIN “

1. Sisembahlah min Tuhan simbelin
Endekenlah min endenden pujin
Tuhan Dibatanta ingan cicio
Sembahlah Ia ola kita menggo

2. Sipembarkenlah kinimbisanNa
Sinalsal terang e me pakenNa
Megang soraNa bagi lenggur kepe
Kalisung-sung e pe ibentasiNa

3. Seh kal ulina penjayamenNdu
Terang ras gelap e nuduhkenca
Udan ras lego k’rina ndatkenca
Kuasa kekelengenNa mbelin tuhu


PEE NO. 110 “SIPEMBARKEN B’RITA SI MERIAH “

1. Sipembarken b’rita si meriah
Sitertaban banci pulah
Sipentang jadi erpengidah
Rakatlah min ersembah
Rakatlah min ersembah

Reff :
Perban lias ate
Tuhanku gegeh dosa enggo talu
Kuasa Kristus tangkas t’ridah
Rasa lalap pujilah

2. Sipembarken b’rita si meriah
Kuasa iblis talukenlah
Si metangkang min jadi robah
Ngasamken kuasa pedah
Ngasamken kuasa pedah
Reff :

3. Sipembarken b’rita si meriah
Dibatanta si perkuah
Ib’reNa kita dalan pulah
Man baNalah ersembah
Man baNalah ersembah
Reff :

4. Sipembarken b’rita si meriah
B’linkenlah kiniulinNa
Geluh rasa lalap baginta
Tetap pujiken Ia
Tetap pujiken Ia
Reff :