“ ‘NGGO KA ME SEH “
1)‘Nggo ka me seh paksa sidang sinode,
Tetap si puji Dibata nge jine.
Dage kawalilah min kami tole,
Gelah terkelin paksa erbebe,
Reff :
Kidekah sidang sinodenta enda,
Ola min sada pe lit si banggerna,
Adi katanalah ban gelementa,
Si eteh nga pa isi benar ‘tah dosa.
2)‘Nggo ka me seh paksa sidang sinode
Itengah-tengah g’reja gebekape
Min si pajekkan kerina si jore
Tapi pekena ‘di lit kin si mbole
Reff :
3) Sidang sinode paksana bentasi
Je olanai min lit si ngagasgasi
‘Di lit la tengteng ras-ras si layasi
Ku si mehuli madin ni ayaki
Reff :
4) Labo kap dalih gia lit ‘nggo sambar
Kinitekennta min tetap la mobar
‘Ban pemereNa man banta nge simper
Gelahna kit ape mere melumbar
Reff :
5) Bas sidang endalah gia pejore
Kune lit denga dahinnta si murde
Sababna banci nge k’rina petembe
‘Di b’re Dibatalah gegeh man banta
Reff :
6) Siniarapken ni perpulungenNdu
Sidang sinode dalanken erluhu
Bas perbahanen perlangkah perlagu
Gelah kerina pagin ‘nggo sentudu
Reff :
7) Dung kenca sidang sinodenta gelah
perpulungenNdu reh tambah ergiah
Nehken kataNdu man kalak si nilah
Maka reh mbarnalah B’rita si M’riah
Reff :
PEE NO. 1 “ SI PUJI “
1) Si puji si puji si pujilah lebe
Si puji gelarNa si puji me dage
Dibata Bapanta si mada Kuasa e
Sinasa kerina ‘nggo i tepaNa pe
‘Lah banci kita ‘rdame
2) Si puji si puji si pujilah lebe
Si puji gelarNa si puji me dage
AnakNa Si Tonggal em Yesus Kristus e
Si teklah man baNa ikeliniNa pe
‘Lah ola kita bene
3) Si puji si puji si pujilah lebe
Si puji gelarNa si puji me dage
Kesah Si Badia Penampat me jine
Ib’rena gegehta ngelawan dosa e
‘Lah ola kita kote
PEE NO. 2 “ SI PUJI TUHAN, HALELUYA “
1) Si puji Tuhan, haleluya
Si puji dage Tuhan, haleluya
Tuhanta Yesus Kristus, haleluya
Tuhan Yesus Kristus
2) Anak Dibata, haleluya
Anak Dibata Bapa, haleluya
Ia juruslamat, haleluya
Ia Juruselamat
3) ‘Nggo keke Yesus, haleluya
‘Nggo keke me kap Yesus, haleluya
Ibas si mate, haleluya
Ibas si mate nari
4) Nggo talukenNa, haleluya
‘Nggo kap italukenNa, haleluya
K’maten si rasa lalap, haleluya
K’maten si rasa lalap
5) DahiNa surga, haleluya
DahiNa me kap surge, haleluya
Ku surge rumah Bapa, haleluya
Ku surge rumah Bapa
6) ‘Je kundul Ia, haleluya
‘Je kundul me kap Ia, haleluya
I kemuhen Dibata, haleluya
I kemuhen Dibata
7) ‘Je reh me pagi, haleluya
‘Je reh me Ia pagi, haleluya
Reh ku pertibi enda, haleluya
Reh ku pertibi enda
8) ‘Ng’ranaken kita, haleluya
Ng’ranaken manusia, haleluya
Si ’nggeluh ‘tah ‘nggo mate, haleluya
Si ‘nggeluh ‘tah ‘nggo mate
PEE NO. 3 “LIAS ATE NI TUHANNTA “
1) Lias ate ni Tuhannta, e lalap man pujin
Ras pe kebenarenNa, pebelinlah madin
Ku e teh peratenN, ras dosa labo singgur
Nggo tetap jujurenNa, si labo banci luntur
Edesken batu mamak, enteguh labo mugur
Bagem kepeken Kam, ‘nggo tetap ibas bujur
2) Si make pedah Tuhan, e
‘Bas terang me dalinna, la ndele pe ukurna
Megedang peratenna, meriah ni akapna
Entah mawen mesera, i’tehna Kam Bapana
La celus pe nahena, Ia abat perdalinna
‘Ban Tuhan pebelinca, nai nari seh matena
3) Kam kap penundalenku, Kam pematangku kin
‘Ban b’linna kuasaNdu, meparas man pujin
Tambah kekelengenNdu, si seh man kami enda
Em jadi tahan-turu, aminna ukur near
Kelewet gia imbangku, Dibata kap njagasa
Kailah kebiarenku, ‘di aku sampatiNa
PEE NO. 4 “ KAM BANGSA DONI MARILAH “
1) Kam bangsa doni marilah
Ersurak k’rina dahilah
Ku Tuhan tutus min gelah
Endeken ‘nde enden si m’riah
2) Ku rumah persembahen min
Ijem’ Dibata man pujin
KelengNa Ia ‘rkerin-kerin
PadanNa labo mobar kin
3) Bapanta erkeleng kepe
Ngenehen kita si ni je
I’tehNa k’rina suinta e
AteNa labo kita bene
4) Si Kristen japa gia pe
‘Nggo pulung k’rina sendah e
Reh muji Tuhan Yesus e
Si ngk’lini manusia jine
PEE NO. 5 “ MERIAHLAH UKURTA MUJIKENCA “
1) Meriahlah ukurta mujikenca,
Dibata Raja mbelin si mulia,
Pe b’linken min gelarNa Si Badia,
Ban Ia ngerajaisa sinasa,
Reff :
Maka bujur nge Dibata man pujin,
Nai nai nari genduari she pagin,
Banta ndaiNa kita k’rina sisuin,
Sembah Ia me madin
2) Dagena mari pujilah Dibata
Si inget min kerina pemereNa
‘Lah tetap ras megegeh pe tendinta
Mehuli me jadina k’rajang jelma
Reff :
3) Keg’luhen manusia i doni enda
E pas kel bagi dukut perturahna
Meter reh angina penggel me batangna
Je minter melus masap pe kap ia
Reff :
4) Tapina kekelengen ni Dibata
La sambar lalap Ia nge kap Bapa
SehkenNa banta kinibujurenNa
Ban labo ‘teNa mate kita enda
Reff :
PEE NO. 6 “‘NGGO KENCA SEH IBAS PAKSANA “
1) ‘Nggo kenca seh ibas paksana
Radu ras me kita rende k’rina
Si puji gelar ni Dibata
M’riah cawir dage ban soranta
Reff :
Si bas Berita Si Meriah
Perukuren tetap min ergiah
Bas si la tengka min ternilah
G’luh si mbaru ‘lah madin peturah
2) Nggo kenca seh ibas paksana
Si penangkih me dage totonta
Bersih ras bulat ban ukurta
Maka serta kita bas k’rajanNa
Reff :
3) Nggo kenca seh ibas paksana
Si orati me kata Dibata
Idur Pustaka si badia
Gelah tambah rusur pengertinnta
Reff :
4) Nggo kenca seh ibas paksana
Si endesken me persembahenta
‘Lah enda banci min erguna
Pebelangken kerajaan Dibata
Reff :
5) Nggo kenca seh ibas paksana
Si B’ritaken kata ni Dibata
Man teman si lenga I’tehna
G’lahna ia atan ka ibasSa
Reff :
6) Nggo kenca seh ibas paksana
Si turiken kerna kecibalta
Senang entahsa suhsah gia
Maka Ia si ngelayasisa
Reff
PEE NO. 7 “O BAPA LA TERIMPIT KAM “
1) O Bapa la terimpit Kam
Idas i doni e pe lang
Kam saja si ateku ngena
La lit sideban erbanca
Makana malem si mesera
‘Tah picet entah ku tera
Kam lalap pematangku kin
K’rajangku la ‘rkerin-kerin
2) Endekenlah ku Kam dage
‘Di mbiar aku ‘tah ndele
Meparas Kam me ku kelengi
Sabab sangan tengah berngi
‘Nggo iteguNdu aku enda
Bas gelap la kap kelesa
Ku dalin si mekelek s’nang
Ku idah ‘je ayoNdu t’ran
PEE NO. 8 “ SUAN KOL “
1) Suan kol la lit ergana,
Suan tomat kena bayung
‘Di cengkih pe labo erbunga
Binaga pe la lit lakona
Anem page k’rina lambing
‘Tah pe manuk kena bernung
Asuh-asuhen pe kerina
Enggo ker me kap terdaya
Reff :
I je pusuhku erbebe
Kuja nari perlawesku
Maka lit si malemna
Ia kap si ngklini aku
Ia kapen sekawalku
Ibas k’rina pergeluhku
Kuendesken man Dibata
K’rina perbeben geluhku
Ia si pejoresa
Pengapul si tuhu-tuhu
Enggo tetap me ukurku
Ibas k’rina pergeluhku
2) S’kali meseng gia rumahta
‘Tah pe calat k’rina erta
Lit keutangen erbinaga
Muat dahin pe kap mesera
Wari lego seh dekahna
Kai pe suan labo mbera
Reh me penakit ukur near
‘Nggo tambah-tindih s’ra suina
PEE NO. 9 “ PESIKAPLAH UKURTA “
1) Persikaplah ukurta,
Adi ndahi Dibata
Ukur si serbut
Si lit ‘bas kita
Endeskenlah man baNa
Reff :
Ban Ia si mereken pengadin
Makana kita dorek min terkelin
Di Yesuslah si bahan man Temannta
E tentu malem kel ateta
2) Pesalang pusuhta
Adi nembah man baNa
Pusuh si gulut, si ndongkelisa
Totokenlah ku Ia
Reff :
3) Gejapkenlah dosanta
Adi ngadap Tuhanta
Dosa si runut, si ngampang kita
Ampekenlah kempakSa
Reff :
PEE NO. 10 “ ‘DI REH KENCA PERCUBAN “
1) ‘Di reh kenca percuban
Tuhan Yesus singk’linisa
Tambah tindih kini s’ran
Minter pindo gegeh baNa
Reff :
Tuhan Yesus singk’linisa
Bas kerina dampar g’luhta
Minter pindo gegeh baNa
Suhsah entah senang gia
2) Baban geluh paksa gulut
Tuhan Yesus singk’linisa
Gelah ukur ula serbut
Minter pindo gegeh baNa
Reff :
3) Sanga rehna keguguren
Tuhan Yesus si ngk’linisa
Maka lampas dat apulen
Minter pindo gegeh baNa
Reff :
4) Ibas paksa kegogon
Tuhan Yesus si ngk’linisa
Gelah ula kerison
Minter pindo gegeh baNa
5) Turah kenca aru ate
Tuhan Yesus si ngk’linisa
Maka pusuh la erbebe
Minter pindo gegeh baNa
Reff :
6) Gelah aru ate masap
Tuhan Yesus si ngk’linisa
Maka imbang k’rina merap
Minter pindo gegeh baNa
7) Kegeluhen perjabun
Tuhan Yesus si ngk’linisa
Maun lit la siangkan
Minter pindo gegeh baNa
8) Paksa mengket rumah mbaru
Tuhan Yesus si ngk’linisa
Gelah dame tengah jabu
Minter pindo gegeh baNa
Reff :
9) Kitik denga gia anakta
Tuhan Yesus si ngk’linisa
Adi paksa s’kolah denga
Minter pindo gegeh baNa
Reff :
10) ‘Di ‘nggo tamat sekolahna
Tuhan Yesus si ngk’linisa
Muat dahin pe kap mesera
Minter pindo gegeh baNa
Reff :
11) Kune reh pinakit cinep
Tuhan Yesus si ngk’linisa
Enggo latih ngadep-ngadep
Minter pindo gegeh baNa
Reff :
12) ‘Di sangana p’nakit nggaya
Tuhan Yesus si ngk’linisa
Mbue erta ‘nggo terdaya
Minter pindo gegeh baNa
PEE NO. 11 “ IBAS SURGA DIBATA BAPA “
1) Ibas surga Dibata Bapa
‘Nggo tepaNa kap sinasa
Kita k’rina me isuruhNa
Engkelengi njagasa
Reff :
Dibatanta Si Telu Sada
Bapa Anak Kesah Si Badia
Em si jadi penundalenta
Dingen pas las bas kinitekenta
2) Tuhan Yesus ku doni enda
Ndilo kalak si ni bas dosa
Gelah jera min kita k’rina
Erban sa;ah ras si la tengka
Reff :
3) Bage ka Kesah Si Badia
‘Di ‘nggo bengket kubas pusuhta
Je megegeh ibanNa kita
Ngelawanca kuasa dosa
Reff :
PEE NO. 12 “ ISE NDIA KALAK ENDA “
1) Ise ndia kalak enda
Rembak ras Tuhanta e
I rudang kuidah k’rina
Janah ersinalsal pe
Ralep alep k’rina je
Rende muji Tuhan e
Ralep alep k’rina je
Rende muji Tuhan e
2) Kalak e ‘nngo itebusina
Alu dareh Yesus e
Tuhan saja si terpuji
Ban keleng ateNa pe
Tuhan ngekep k’rina e
Rembak lalap rasSa je
Tuhan ngekep k’rina e
Rembak lalap rasSa je
3) Kusuhsahen inanami
Paksa ibas doni e
Sui ate iakapi
Seh ku kesenangen e
Kalak si ‘nggo je kepe
Sangap me akapna pe
Kalak si ‘nggo je kepe
Sangap me akapna pe
4) K’rina ia m’riah rende
Muji Tuhan Yesus e
Terbegi sorana tangkas
‘Rbanca ate ‘nggo melas
Siniayakina e
‘Nggo jumpasa k’rina je
Siniayakina e
‘Nggo jumpasa k’rina je
5) Lanai kapen seh man banta
Kesuhsahen doni e
Lanai jumpa ibas surge
Si nuhsahi kit ape
Kuasa dosa masap kap
Sitik pe lanai gejap
Kuasa dosa masap kap
Sitik pe lanai gejap
6) Tuhan Dibatanta kapen
Si ‘rban ukur malem nge
Yesus jadi pengarapen
Maba ku bas surga e
E’ nggo sangap k’rina je
La lit kebiaraen pe
E’ nggo sangap k’rina je
La lit kebiaraen pe
PEE NO. 13 “AKU TEK MAN DIBATA “
1) Aku tek man Dibata Bapanta
La ersibar kuasaNa man banta
Sinasana kap enggo tepaNa
KelengiNa me kap manusia
2) Aku tek man AnakNa si Tonggal
Eme kap Yesus Kristus Tuhannta
Enggo mate i uruk Golgota
Keke ka nangkih Ia ku surga
3) Aku tek empak Kesah Badia
Ngarak-ngarak kecibal geluhta
Aku tek lit gereja badia
E terkelin kap aku ibasna
PEE NO. 14 “ TUHAN YESUS SI PERKUAH “
1) Tuhan Yesus si perkuah
IbabaNa ka pentuah
Reff :
Malem kel ate kami
Adi Tuhan tetap si nampati
2) Tuhan Yesus maba dame
Ukur serbut jadi longgae
Reff :
3) Tuhan Yesus teman nggeluh
IbabaNa tenang pusuh
Reff :
4) Tuhan Yesus terang doni
Ban ukurNa kin mehuli
Reff :
PEE NO. 15 “ KATAKENLAH MAN PUSUHKU “
1) Katakenlah man pusuhku
Pepankenlah bas ukurku
I demiNdu geluhenku
Tetapkenlah pengarapenku
Pegaralah kinitekenku
Alu Kesah ras KataNdu
2) Si ingetlah wari Tuhan
PedahNa e si pakeken
B’ritaken Kata Dibatanta
Man k’rina bekas tinepaNa
Pegaralah kinitekenku
Alu Kesah ras KataNdu
3) Kam Tuhan me penampatku
Ku’ndesken baNdu geluhku
O Yesus Kam me penalemen
KuasaNdu me jadi gelemen
Pegaralah kinitekenku
Alu Kesah ras KataNdu
PEE NO. 16 “ TUHAN DIBATA TETAP SI NEMANI “
1) Tuhan Dibata tetap si nemani
Adina sirang gia kita kari
Rarasen Tuhan ola kel silahi
‘Lah jump aka pagi kita ngulihi
Reff :
Sirangkin gia kita tik nari
Tuhan Dibata ‘lah ‘ban sinampati
She ngayak jumpa kita ngulihi
Juah-juahen min kula ras tendi
2) Ibas mentasi k’rina wari-wari
Kesah Badia bahan si ngkawali
‘Di setan iblis ‘tehndu nge la uli
Sitik pe ola ‘nggit kam idiheri
Reff :
3) ‘Tah paksa suhsah gulut gia sekali
Minter turiken baNa si terjadi
Tentu si serbut banci salangsai
‘Di Tuhan Yesus banndu si ngapuli
Reff :
4) Kidekah pusung ndabuh ibas doni
Kerna pergeluh labo tersipati
Adi dosanta enggo ijelasi
E surge naring’ pagi ingan ngadi
Reff :
5) La kapen ndekah ‘nggeluh ‘bas pertibi
Kerna pelawes la ‘teh katawari
Perbahanennta oratiNa ng’ pagi
Maka lagunta ‘banlah si mehuli
Reff :
PEE NO. 17 “TUHANNTA YESUS E I SURGA “
1) Tuhan Yesus e i surga
Nikapken ingan banta kin
Begiken Kata Tuhan banta
Janahna tek lah kita min
Reff :
KataNa kap pengapul e
Man kalak si tek baNa e
KataNa kap pengapul e
Man kalak si tek baNa e
2) ‘Di teman ibas doni kepe
Ndarami untung bana kin
‘Di Tuhan Yesus labo lapen
Tapina ngk’lini kita nge
Reff :
3) Iban kekelengenNa banta
LawesNa ku das Golgota
ItahenkenNa si mesera
G’lah kita ola bene ka
Reff :
4) Perukur jelma manusia
E mobar-obar rusur nge
‘Di Tuhan Yesus labo kapen
KataNa ras kelengNa nge
5) O Yesus Kam me teman kami
Tegulah kami k’rina min
Rajailah gegeh ukur kami
Babailah seh ku surge kin
Reff :
PEE NO. 18 “ O KAM SI ‘BAS KEMATEN SI GELAP “
1) O kam si ‘bas kematen si gelap
Kekeken nina Yesus kap ngerana
Begiken , dengkeh ken soraNa me gelah
Kekeken ! Si ernala ‘Nak Dibata
Reff :
Kebiaren mbelin bene nge kam mawen
Kekeken pedas ola kel melawen
Geluhndu ‘ntisik picet bas dahin
Kekeken min dage me jingkat kin
2) O kam kerinana si medem bas dosa
Kekeken ! Enggo ndekah me suari
‘Ban lit t’rang Dibata ‘nggo pultak i jah
Kekeken ! ‘Nggo ernala nai-nai nari
Reff :
3) It’rangi ni Kristus me kapen ukurndu
Kekeken ! O perdosa ola lolah
Dibata nge kap si ndabuhken ukurndu
Kekeken kotes ‘tahsa lanai ndekah
Reff :
4) Ertuah kin kalak si ‘rdalin bas terang
Kekeken ! Maler kap pasu-pasuNa
‘Di gelap gia jenda megati nge menang
Kekeken ! La ‘nggo berngi pe man bana
Reff :
5) Man bandu kap sendah nge Tuhan erdilo
Kekeken minter, melawenca denggo
Medakken o kam si ni bas kematen
Kekeken ! Pedah Yesus man paken
Reff :
PEE NO. 19 “ PERLU SI ‘TEH “
1) Perlu si eteh entah ise nge si salah
Adi sempat kin teremen kalak suhsah
Ise nge nda Ia erpapah
Kune rembangkin buen jelma si gebah
Reff :
Min metenget kita ola sempat lolah
Si la payo gelah minter si penilah
Si mehulilah peturah
‘Lah Dibata si mereken banta tuah
2) Perlu si eteh entah ise nge la tengteng
Adi sempat kin teremen si ndehereng
Ise ngenda si la tintang
Kune rembang pagi mbakbak kita rutang
Reff :
3) Perlu si eteh entah ise nge ertaki
Adi sempay kin si musil to kohi
Ise ngenda si la uli
Kune rembang t’remen si rate mesui
Reff :
4)Perlu si eteh entah ise nge si latlat
Adi sempat kin megati jelma rubat
Ise ngenda biakna ilat
Kune rembang si megombang
Reff :
5)Perlu si eteh entah ise nge si nipu
Adi sempat si mesera tebu-tebu
Ise ngenda si la malu
Kune rembang kita k’rina banna juru
Reff :
6) Perlu si eteh entah ise nge la payo
Adi sempat kin enterem si ergogo
Ise ngenda si mehado
Kune rembang kalak bujur pe itangku
Reff :
PEE NO. 20 “ OLA MBIAR “
1) Ola mbiar ota neh
Ersurak dingen meriah
Sabab mbelin perbahanenNa
TinepaNa si rejin
Reff :
Lukuten jadi melala pagena
Ras pekeben jadi simpar isina
Lukuten jadi melala pagena
Ras pekeben jadi simpar isina
2) Ola min ukur cengkal
Asuhen i tengah mbal-mbal
Sabab simpar dukut meratah
Batang kayu erbuah
Reff :
3) Mari kita kerina
Ersurak kempak Dibata
Ni sehkenNa liat ateNa
Susur udan man banta
Reff :
No comments:
Post a Comment